18.09.2018
Die Rheinpfalz

Leserbrief
„Mir Saarlänner verstehn das“

Zu den Mundart-Kolumnen „Do bische platt“ vom 28. August und 11. September sowie zum Leserbrief „Unbedingt erhalle!“ von Wilma Hilgert vom 4. September:

Eigentlich duun ich mich jo nit gäre in annerleids Sache inmische, aber wo do immer widder geschrieb werd, was die Saarlänner wollte und kennte, do muss ich doch wirklich mool e Wörtsche dazu saan. Eigentlich hätt ich das neilich schon mache solle. Denn was die Wilma Hilgert geschrieb hat, trefft de Nachel uff de Kopp. Warum solle mir im Tschifflick aussteije, wenn mir in de Rosegarde wolle? Von dem Platz an der Landauer Strooß, kurz bevor de Zuuch in die Kurv no Contwig faad, ist ma doch ganz schnell am Rosegaade. Unn iwrischens net nur dort, aach im Schwimmbad, uff de Rennwies und wäs de Deiwel wo noch hin. (...) Unn wenn ma zum Tschifflick will und weider zur Fasanerie hoch, dann kann ma dort a aussteije. Wenn ma de Birjersteig uff de Brig iwer de Schwarzbach mol sauwer mache würd und dann noch e Weg von e paar Meter anlege würd, dann wär ma schnell am Meisewinkel un kennt de Bach entlang gehn. Unn wenn ma zum Rosegarde wolle, dann wolle mir net durch die ganz Stadt laafe, sonschd fahre ma gleich woanders hin.Wenn mir Saarlänner was vun Zwebrigge kenne, dann de Rosegarde. Der Name kennt doch net besser sinn. Wie finne dann die Leit de Weg? Also, wenn mich hier e Pälzer nom Weg frod, dann erklär ich dem das gere. Nadierlich, wenn alle Naas lang enner klingele werd, das ging auf die Nerfe. Awer das muss jo net sinn. Ma muss nur dofier sorge, dass die Leit sicher iwer die Landauer Strooß komme, unn dann braucht ma noch e paar Schilder mit em Pfeil „Zum Rosengarten“. Das verstehn fascht alle Saarländer, die meischde kenne läse. Unn fier die, die net läse kenne oder nimeh gudd siehn, denne molt ma noch e Ros dennäwe. Wenn dann werklich noch Leit bei der Nummer 108 klingele, dann hängt ma näwer die Klingel e Schild „Hier ist nicht der Rosengarten, sondern in der anderen Richtung. Drehe eich änfach um“. Ma sollt nadierlich gucke, dass um de Bahnsteig alles scheen ordentlich aussieht.

Die Sach mit dem jetzische Hauptbahnhof scheint jo mittlerweile in die richtisch Richtung zu gehn, hoffentlich a noch no de Wahl. Um mit dem Zuch se fahre, braucht ma heidzudachs jo nimmer so e großer Bau, awer es fiehlt sich schon komisch an, wenn ma von der Stadt kommt un außerum laafe misst. An sich is de Weg rechts rum nit so viel weiter, awer wenn ma knapp dran is, weil es em im scheene Zwebrigge so gut gefall hat, dann spielt das schon e Roll.

Noch ebbes: De ledschde Zuuch no Saarbrigge fahrd schon um Viertel no neun, und de Ledschde no Pirmasens um Viertel vor zehn. Wo gibt’s dann so was?! Do hann die Zweebigger so e scheene Bahnhof un vor zehn were schon die Bahnsteige hoch geklappt?

Gerhard Stengel, St. Ingbert


28.08.2018  Fer uns is de Bahnhof e Vemächtnis    
Die Rheinpfalz

04.09.2018  Zweibrücker Bahnhof: „Unbedingt erhalle!“ - Leserbrief    
Die Rheinpfalz

11.09.2018  Die Saarlänner dääde an meiner Dier klingle    
Die Rheinpfalz