04.09.2018
Die Rheinpfalz

Zweibrücker Bahnhof
„Unbedingt erhalle!“

Zur Mundart-Kolumne „Do bische platt: Fer uns is de Bahnhof e Vemächtnis“ vom 28. August:Liewer Wolfgang Ohler!

Wo de recht hasch, hasche Recht! Dene Bahnhof misse mer rette! Mit aller Macht un Kraft! Sin net bal Wahle? Wer de Bahnhof hat, hat schunn die halbe Wahl gewonne. Mir all, die sich Zweebrigger nenne, wolle. Des sin mir unsere Aldvordere schuldich. Dozu geheert mei leider verstorbener Hannes (er is noch mit de Dampflok no Hornbach gedüst) un, wenn ich mich recht entsinn, hasch Du a noch ehrbare Verwandtschaft gehatt? De Sepp vum Hallplatz hat a einische unvergessene Bahner erwähnt. Mir misse dene Bahnhof in Ehre halde, koscht’s was es will. Notfalls erwerwen mer Anteile, wenn die Stadt alles Geld an de Schwarzbach un ans Wasser gehonk hat.

Doch was de am End schreibsch, vun Tschiflik – nee, do kann un will ich Dir net recht gewe. Die Saarlänner solle in Zukunft an dem Haltepunkt am Freibad aussteie un des Sticksche dorch de Ehrbusch un die Fasnerie laafe oder solle vun mir aus noch dene Haltepunkt Tschiflik nei beantrache. Nix fer ungut, s’Wilma vun de Ixmer Strooß. Newebei bemerkt: Es werd sich doch jemand finne losse, der e Filial vume Reisebüro dodrin uffmacht – un ener mit Zeidunge un Weck!

Wilma Hilgert, Zweibrücken