11.09.2018 Die Rheinpfalz
Die Saarlänner dääde an meiner Dier klingle
Do bische platt: Ich will net noh Wladiwostok – Haltepunkt wär grad fer die Katz Von Wolfgang Ohler
Ich free mich immer arisch, wann ich uff mei Beiträäch in de Rheinpalz e Echo krie. Manchmol spreche mich die Leit an de Kass beim Aldi an, manchmol ah an de Thek, wann ich dort mi’m Paul mei Feierowendschöppche drink. Diesmol hab ich uff mei Lamendo vun vor verzeh Daa wejem Bahnhof sogaa geschribb kriet: E Dankschreibe, dass ich defor gesoit hätt, dass de Bahnhof an die Gemeinnützische vekaaf werd un net in fremde Hänn kommt. Alla, ich will mich jo net mit fremde Feddere schmicke! Ebbes hat mich an de Reaktione abber gestört: In em Leserbrief heeßt’s, die Saarlänner wäre uff die Reaktivierung vum ehemalische Bahnhof Tschiflick net angewies, sie kennte nämlich ball mi’m ICE bis zur Haltestell „Am Rosengarten“ fahre, dort gemiedlich aussteije un sich die scheene Rose angucke.
Jetzat mol dussma, ihr Leit! Also erschdens misst der Haltepunkt gans annerschder heeße, nämlich „Bahnhof Kandon“, weil des de Name vun unserm Stadtverdel do hinne an de Landauer Strooß is, ah wann des nimmie viel wisse. Alles annere wär e Etiketteschwindel. Un zweddens werd’s denne Bahnhalt sowieso net gewwe, semindescht net, wann’s noh mir geht. Guud, ich kennt dann e paar Haiser weider in de Zuch steije un iwwer Landau, Mannheim, Berlin, Moskau direkt noh Wladiwostok fahre. Awwer was soll ich dann dort? Un ich bin noch aus’m gans annere Grund degeje: Wann die Saarlänner dort hinne am Bahnstop Rosengarten austeije dääde, wär weit un breit kee Rosegaade se siehn. Also marschiere se die Landauer Strooß e Stickche entlang, gucke sich noh alle Seide um, awwer nix se mache, kee Rose in Sicht. Un was mache se dann, die Besucher aus Humboich un Kaschdel? Sie klingele halt am nächschde Haus mit de Nummer 108, um nohm Weesch zum Rosegaade se froon.
Des is jetzat zufällisch mei Haus, ich hab mich grad zum Middasschläfche hingeleet un werr geweckt. Desweje bin ich zu denne saarlännische Hausdierklingler ah net grad nett un saa ne, sie solle mich in Ruh losse un hingehe, wo se herkomm sinn. Also marschiere die Besucher aus Saarbricke un Dudweiler net in de Rosegaade, sonnern widder serick zum Haldepunkt un fahre enttäuscht heem. Mit annere Worde: Der Haltepunkt wär grad fer die Katz.
Alla, mei Schwiechervadder Rudi dääd scheen mit mer schelle, wanner’s noch kennt, weil er nämlich e Bundesbahner gewest is. Mei Vadder Karl degeje war e Poschdler, un die zwee, de Rudi un de Karl, hann oft minanner dischbediert, was dann wischdicher wär, die Bahn odder die Poschd. Am Enn hann se sich dann immer vedraa un im Chor gesung: Ohne die Poschd un die Bahn wär unser Welt arisch arm dran. Awwer des is jetzat e gans annerie Geschichd.
28.08.2018 Fer uns is de Bahnhof e Vemächtnis
Die Rheinpfalz
04.09.2018 Zweibrücker Bahnhof: „Unbedingt erhalle!“ - Leserbrief
Die Rheinpfalz