14.10.2025 - Die Rheinpfalz/br>
Do bische platt Mit der Bahn von Zweibrücken nach Homburg: Bei der Festfahrt 1875 gewaltig geirrt
Von Wolfgang Ohler Dem Mundart-Kolumnisten Wolfgang Ohler sind alte Dampfloks, wie sie am Wochenende durch Zweibrücken fuhren, noch aus seiner Kindheit bekannt.
Eischentlich will mer’s nimmie lese un nimmie höre: Die Bahn soll widder vun uns noh Humborsch un serick fahre. Ei wie oft is uns des schunn vesproch worr. Die Bahn is unser Kamel un die Streck niwwer is es Nadelöhr! Seledschd hat unser OB um e Fässje Bier gewett, dass er selbert in seiner Amtszeit die Kell fer die Abfahrt hebe dääd. Jetzat kann er bloß uff e zweddie Amtszeit hoffe, weil die erschd nächschd Johr ablaaft un noch kee Fahrplan die Streck Zweebricke Hauptbahnhof – Humborsch Hauptbahnhof nennt. Awwer eischentlich hat er die Wett schunn velor un kann des Fässje bestelle.
Des Fässje hätt am Wocheend ganz gut gebasst, denn jetzat soll’s doch werklich losgehe. Immerhin stehe die saarlännisch Minischderpräsidentin Anke Rehliner un ihr Kolleesch, de Aldexander Schweitzer aus Määnz, jetz im Wort, dass es Bähnche ab 2028 nur so zwische de zwee Nochbarstädt hin un her wetzt. Aller, rechene mer die üblich Vezöcherung dezu, dann kennt’s 2032 tatsächlich soweit sinn. Länger sollde se sich kee Zeit losse, sunsch erleb ich des nimmie.
Gefeiert worr is es Jubiläum vun de Bahnstreck Zweebricke – Landau, die vor 150 Johr in Betrieb genomm worr is, nämlich genau am 25. November 1875. Des is werklich e Tradition, die sich siehe losse kann. Awwer wammer 1989 net es Gleis noh Humborch fer de Personevekehr dicht gemacht hätt, wär so e Jubiläum schunn vor Johre fällisch gewest. Am 10. Mai 1857 hat nämlich die Festfahrt vum Schönhof, wo de erschde Zweebricker Bahnhof gewest is, noh Humborsch stattgefunn. Un de Farikant Christian Dingler is als Mitbegrinder vun de Eisenbahngesellschaft domols selber mitgefahr un hat gesaat, des wär jetzat uff ewisch die Lebensader zwische unsre zwee Städt. Aller, do hat er sich halt geschnerrt un is es Johr druff gestorb.
Was domols selbvestännisch war, is beim Jubiäum am Wocheend die Attraktion gewest: e gewaldischie Damplok. Un ah die Waggons ware von geschder un vorgeschder. Mir is des jo alles noch aus meiner Kindheet bekannt, do hat’s nix anneres gebb. Ich bin mit denne Ungetümer prakdisch groß worr.
De Bahneinschnitt im Kandon is nämlich unser Spielplatz gewest. Uff em Schild hat zwar gestann „Betreten des Bahngeländes streng verboten. Die Bahnpolizei“, awwer des hat uns net gejuckt. Mir hann am Bahnrech im Gestribb Haisjer gebaut und Indianer gespielt.
Mir sinn ah mol iwwer die Gleise gewetzt, des war net so gefährlich, wie mer menne kennt, weil mer de Zuch meileweit gehört hat. Die Lokfiehrer hann außerdem exdra fer uns laut gepiff. Do hammer ne halt Platz gemacht un uns in de Grabe neewem Gleis geduckt. Un wann mei Muddie owens gefroot hat, was mer gemacht hann, hab ich gesaat: Eisbahn gespielt, do war se sefriede.