09.09.2025 - Die Rheinpfalz -
De Heckeweesch is mei Boulevard un Traumpad
Do bische platt: Was mer guud kennt, des is net hässlich Von Wolfgang Ohler
Wann ich mit de Romi unnerwegs bin, bleibe ab un zu die Leit bei uns stehe un vezähle mer, dass se mei Kolumne do in de Zeidung lese un sich driwwer freeje. Des freet dann widder mich, un mir meije e bissje. Bis es Romi ungeduldisch werd un an de Lein zerrt. Neilich hat mich e Ehepaar im Heckeweesch angesproch. Heckeweesch, so nenn ich des Pädche zwische de Landauer Stroß un’m Freibad. Offiziell hat des gaa kee Name. Ich nenn’s so, weil’s frieher hiwwe un driwwe Hecke gebb hat, die’s vun de Gärde abgegrenzt hat. Heit is des Weegelche im owwere Deel zu de Landauer Stroß breider als wie frieher, weil’s die Zufahrt zu dem Haus am Bleecherbach is.
Dort also hat mich des Pärche angesproch. Ei ich sollt doch emol iwwer des hässliche Pädche schreibe, des wär doch e Schann. Vor allem wo des de Weesch vum Bahnhaldepunkt am Mariestään zum Rosegaade wär. Bei Reenwedder wär’s e Zumudung, dorch die Pitze se laafe un sich die Schuh dreckisch se mache, un sunschd wär’s arisch stabisch. Aller, hab ich gesaat, es stimmt schunn, dass des Pädche net zu unserm scheene Rosegaade un de Allee basst. Ab un zu duun die Männer vum UBZ e Schipp Brasch iwwer die Pitze werfe, awwer des is kee Lösung. Wissener was, hab ich gesaat, ich mach’s un schreib iwwer“s Pädche, Ehrewort.
De Heckeweesch un die Großeldere
Un jetzat bin ich also debei, mei Wort se halle. Awwer wann ich ehrlich bin, finn ich denne Heckeweesch gaa net so hässlich. Des kommt doher, weil ich ne seit meiner Kindheet kenn un schunn e Million mol gang bin. Un was mer guud kennt, des emfind mer nimmie als hässlich, ah wann’s so is. Zum Beispiel die Großeldere: Die kenne so runzlisch un schroh sinn, wie se wolle, mer is mit ne vetraut un hat se lieb, un desweje sinn se net hässlich.
Als Kind bin ich denne Weesch an de Hand vun meiner Muddie gang, wammer in de ie Stadt inkaafe sinn. Uff de een Seit war die Gärtnerei Babilon, uff de anner de Gaade vum Schandarm Scheuermann. Die ald Frau Babilon hat alle Daa gegärdelt un sich bei scheenem Wetter die lange, grooe Hoor in de Bränk am Brunne gewäsch. Manchmol is se an die Heck komm un hat mer e Appel odder e Beer geschenkt. Im Summer bin ich mit de Freinde in de Badehösselcher nunner zum Freibad an de Schließ gerennt, barfuß iwwer die Steencher un dorch de dickschde Dreck. De Heckeweesch hat praktdisch schunn zu de Schließ gehört. So raulich un schroh wie er is, in meine Erinnerunge is er e Boulevard un e Traumpad, un so soll er bleibe, un domit basda.
