Do bische platt: Geständnis eines Gleisüberquerers
Wolfgang Ohler Bahngleise zu überqueren war für unseren Mundart-Kolumnisten Wolfgang Ohler ganz normal. Warum das damals aber ein wenig anders war und warum es trotz Old-Shatterhand-Taktik Ohrfeigen gab, erzählt er in dieser Geschichte ohne Moral.
Jetzat bin ich hin un hergeriss, soll ich odder soll ich net? Derf mer iwwer sei Schanntade schreibe, ah wann’s bloß Bubestreiche gewest sinn? Uff de anner Seit: Daucht die schlimmschd Gaunerei net doch noch als schlechdes Beispiel? Aller, ich mach’s un hoff, dass des bloß veninfdische Erwachsene lese. Ich hab mich glei dran erinnert, wie ich geles hab, dass immer meh Leit vewitscht werre, wie se iwwer die Bahngleise steie, obwohl doch jeder weeß, wie gefährlich des is. Un ah wann nix bassiert, misse die Ziech oft bremse, un manchmol werd dann e Streck ganz gesperrt un es gebt Veschbädunge. Desweje werre die Gleisehupser ah streng bestroft, wann se vewitscht werre; ab 30 Euro uffwärts koschd der Spaß.
Bahndamm war domols unser liebschder Spielplatz
Wann se uns dodebei frieher geschnappt hätte, wie mir als Bube iwwer de Bahndamm am Enn vun de Storjestroß gewetzt sinn, hätt ich heit noch e Haufe Schulde. De Bahneinschnitt un de Bahndamm ware domols unser liebschder Spielplatz. De Bahnresch hat glei hinnerm Zaun vum Gaade vun meim Freind Hannes angefang, un des Zainche war fer uns Lauser nadierlich kee Hinnernis. Dort hinnerm Zaun hat unser Urwald angefang. De ganze Resch war dicht bewachs mit Brennnessele, Geschdripp, Akazie un Affebrotbääm, also e herrliches Gelände fer de Tarzan un die Sioux, die mir nohmiddas ware. Mit hann uns Höhle in die Erd gegrab, Haisjer aus Äschd un Laab gebaut, hann mit wilde Diere gekämpft un noh Schätz gebuddelt; was halt so Kinner domols gespielt hann, als es noch kee Smartphone gebb hat.
Un jetzat kommt’s: Mir sinn ah iwwer die Gleise gewetzt, weil’s uff de anner Seit genau so intressant gewest is. Un noch schlimmer: Mir hann’s gemacht wie de Old Shatterhand, hann’s Ohr uff die Schien geleet un gehorcht, wann de nächschde Zuch kommt. Odder mir hann e Grosche uff’s Gleis geleet un ne platt fahre losse. Es war domols allerdings net so gefährlich wie heit, weil’s noch Damplocks gebb hat, die de meileweit gehört hasch un die ah wie verickt gepiff hann, wann se in die Näh vum Bahniwwergang komm sinn. Mir ware also immer zeidisch gewarnt.
Schneller als wie die stracke Schandarme
Uffbasse mussde mer trotzdem, weil sich als die Bahnbolizei angeschlich hat. In dem Gestribb un in de Brennnessele ware mir awwer immer schneller als wie die stracke Schandarme. Un doch is de Peter eemol vewitscht worr, un de Bahner hat ne mitgeschleppt zum Haisje vum Bahnwärder Konrad. Denne do siehn mir im ganze Leewe nimmie, hat de Hannes gemennt. Aller, ganz so schlimm war’s dann doch net, un de Peter is mit e paar Ohrfeische devunn komm. Mir allegar sinn devunn komm un desweje hat mei Geschichd am Enn ah kee Moral. Awwer Kinner lese jo kee Zeidung, sodass se sich an mir kee schlechdes Beispiel nemme kenne, zum Glick.
Heute fahren die Züge im Bahneinschnitt 90 km/h, in den Kurven 80 km/h. Das entspricht 25 m/sec. openrailwaimap.orgFrüher fuhren die normalen Personenzüge kaum langsamer, waren allerdings lauter. Langsamer und leise waren allerdings sog. Kleinwagen. Züge kommen auch nicht immer nach Fahrplan.Gleisüberquerung war und ist immer riskant, auch die Umgehung von Bahnschranken.